Kisah petani

Dahulu ada patani nang handak managkap tikus nang ada di rumahnya. Lalu patani tadi manukar parangkap tikus, malihat patani manukar parangkap, tikus nang ada dirumah tadi takutan banar. Lalu inya bukah ka kandang hayam, handak balapur anu hayam, jar tikus, yam tulung yam, di rumah wahini ada parangkap tikus !. Aku umpat prihatin kus sai, tapi aku kada kawa manulungi jua, maaf kus lah.. ujar hayam manyahuti. Lalu tikus bukah pulang anu kambing, mbing tulung mbing di rumah ada parangkap tikus.! Aku turut basadih kus sai. Tapi itu lain urusanku, jar kambing jua. Bukah pulang tikus tadi anu sapi, tapi sapi kada kawa manulungi bahkan manyahuti ta kasar sadikit, jar sapi parangkap tikus tutu kadada pangaruhnya lawan aku. Pa ampihannya tikus balapur anu ular, tapi kukurang labih nang lain ular manyahuti bahwa parangkap tikus tutu lain kawenangan inya. Jadi kada kawa manulungi. Marasa kadada nang hakun manulungi bahkan sakadar mambari saran kaya apa baiknya, lalu tikus babulik ka rumah patani lawan parasaan sangkal wan takutan. Singkat kisah, pas tangah malam gagaratak di atas luting bunyi ada nang kana parangkap. Sakali diitihi kalinya nang kana parangkap ular, sabab buntutnya haja nang takapit lalu amuk ular tadi. Sabalum kapalanya dicatuk patani ular tadi sawat mamatuk ka tangan nang bini patani tadi. Langsung bininya dibawa karumah sakit, sabab kada baduit sagan bayar rumah sakut lalu di jual sapi ka tukang daging. Alhamdulillah karna sudah bigas lalu nang bini tadi dibawa bulik. Nang ngaran urang hanyar wagas garing liur nang bini handak bamamakan nang nyaman. Batagihan handak sup hayam lawan sati hati kambing. Lalu ngaran sayang banar lawan nang bini patani pun manyumbalih hayamnya lawan kambingnya sagan dimasak sasuai kahandak bininya. INTINYA AMUN ADA MASYARAKAT NANG MANGADU/BAKISAH SUATU MASALAH KADA SALAHNYA KITA TULUNGI, PALING KADA MAMBARI SARAN KAYA APA JALAN KALUARNYA, SABAB AMUN KITA KADA PADULI BISA HAJA DAMPAKNYA BISA KANA KITA JUA.